Ютазь недлясто Мордовия Республикань Госсобраниянь депутаттнэ пуромкшность нилеце тердемань 26 сессиянтень. Чинь повесткантень совавтозельть кавто кевкстемат. Васенцесь – «О республиканском бюджете Республики Мордовия на 2010 год и на плановый период 2011 и 2012 годов» МР-нь Закононтень совавтовиця полавтоматнеде». Те талновтыця кевкстеманть коряс кортась МР-нь Правительствань Председателень васенце полавтыцясь – Финансонь министрась Н.В.Петрушкин. Николай Владимирович тешкстызе, тедедень пси кизэсь кандсь покш зыян велень паксятнесэ касовкстнэнень. Пиземесь овсе арасель ды чись костизе весе сюронть, ракшань андомс тикшенть. Тень кувалма эряви явомс лезкс сюронь, тикшень кастыцятненень, ракшань трицятненень.
Н.В.Петрушкин тешкстызе, целевой бюджетэнь кредитэнть вельде одс явовить Мордовия Республикань бюджетэнь тевс нолдавиця ярмактне. Кредитэнть покшолмазо – 1 млрд. 54,6 млн. целковойть. Субсидиятне явовить истя: льготань коряс видьмень ды минеральной удобрениянь явомс «Развитие села» ГУП-нтень максовить 390 миллионт целковойть. Малав 630 млн. целковойть максовить юридической лицятненень, башка предпринимательтненень, конат кандыть емавкст пертьпельксэнь пси шкадонть. Неть субсидиятнень мереви ютавтомс ракшань андомс тикшень рамамс. Субсидият максовить юридической лицятненень, конатнень тевдеемаст сюлмазь сад-пирень кирдеманть марто. Лезкстэме а кадовить сеть ломантнеяк, конат кирдить подсобной хозяйстват. Истя, республикань районтнэнень, Саранск ошонь округонтень явовить 30 млн. 400 тыщат целковойть. Субсидиятне кармить максовомо скалтнэнь трямс-кастомс.
Николай Владимирович мерсь:
– МР-нь Правительствась учи, федеральной бюджетстэ явови эште вейке кредит. Сестэ карми ванкшнозь подсобной хозяйствань кирдиця эрицятненень лезксэнь явомадо кевкстемась.
Н.В.Петрушкин истя жо евтнесь, сессиянть ушодовомадо икеле Мордовия Республикань Правительствас гайневтсть Федеральной центрасто. Тосто пачтясть, палозетненень компенсациянь пандомс ды од кудонь стявтомс явозь 273 миллионтнэнень максовить эште 230 млн. Истя жо тешкстызь, неть ярмактне максовить аволь ансяк вирень пожартнэде зыянс понгозетненень, кода евтазель икеле, пертьпельксэнь паломатнеде целанек.
Истя жо тешкстазель, одс явовить МР-нь бюджетэнь ярмактне, конат ютавтовить спортонть кемекстамонтень.
Седе тов сессиясонть мольсь кортамо «О государственной поддержке сферы культуры» Мордовия Республикань Закононтень совавтовиця полавтоматнеде». Те кевкстеманть коряс толковамот макссь МР-нь Культурань министранть васенце полавтыцязо В.Ф.Цилин. Сон тешкстызе, лезкс карми явозь культурань сеть енкстнэнень, конат кандыть покш смусть Мордовия Республиканть туртов.
Меельцекс пуромозтне чатьмонемань минутасо ледстизь МР-нь Госсобраниянь икелень Председателенть В.А.Кечкинэнь.
Вечкевикс эрицят!
Пшкадемс Тенк кармавтыть талновтыця тевтне, конат лисить республикасонок.
Меельце иетнестэ секе тев кортатано, ДТП-нь эйстэ емавкстнэ кармасть цела раськень стакачикс. Ломантне емавтыть эрямост ды шумбрачист килангонь зыянтнэсэ ков седе сеедьстэ лия транспортонь авариятнень коряс. Маштовить ды томбавить одт, эрямос бажиця ломанть.
Тедедень сисем ковтнень перть республикасонок ДТП-сэ маштовсть 79 ломанть ды малав 700 – томбавсть.
Августонть ушодовомсто эрямосто уш тусть 23 ломанть, 77 – томбавсть.
Тень кувалма ули мелем пшкадемс Тенк, ветицятненень ды ялго якицятненень, эдь сеедьстэ килангонь зыянонь тевень лисемань тувталокс ашти ардомань правилатнень а топавтомась.
Автотранспортонь ветицятне сасыть вейкест-вейкест а меревикс таркасо, а ваныть светофоронть лангс, лисить каршо молиця полосантень, ардыть эрязасто. Озыть руль экшс иредьстэ. Ансяк тедедень сисем ковтнень перть 2481 ветицятнень саезь праваст.
Эрицятне печтить килангонть а меревикс таркасо, якить ардома киванть. Сехте зыяновось, зярдо аварияс понги эйкакш. Тедеде республикасонок лисезь эрьва кавксоце ДТП-сэнть понгсь эйкакш. Автомашинань салонтнэсэ томбавсть 35 эйкакшт. Тешкстама, ансяк вететнесэ ульнесть эйкакшонь кирдемань креслат. Штрафтне овсе а тандавтыть эрицятнень.
Эрьва иестэ ламолгадыть эйкакштне, конат томбавить велосипедэнь, скутерэнь, мотоциклань ветямсто. Мейсэ тень толковамс? Ансяк вейкесэ – тетятне-аватне а явить тенень мель, мерить эйкакшост туртов ардтнемс правилатнень апак сода.
Покштне улест невтевксэкс эйдест туртов. Килангонь культуранть кастоманзо-кепетеманзо эряви ушодомс семиясо, эйдень кужосо, школасо. Невтевксэкс улезэ – ветицятнень ды ялго якицятнень ютксо чарькодемась, килангонь правилатнень топавтомась, аволь эрязасто ардомась. Ансяк тень пингстэ полавтовить тевтне, ванстови ломантнень эрямост ды шумбрачист.
Вечкевикс ветицят! Илядо эрязасто ардо, неть минутатне мезеяк а полавтыть, нолдадо кинь трокс ютыцятнень.
Вечкевикс эрицят! Печтядо кинть ансяк меревикс таркатнесэ.
Тетят-ават! Кирдеде мельсэнк, автомашинасо эйкакшонь ускомс эрявить креслат. Эйкакштненень эряви тонавтнемс ды кенярдомс эрямонтень, аволь маштовомс ды томбавомс китнень лангсо.
Килангонь зыянтнэ а аламолгавтовить чумондоматнень казякавтомасо ды штрафтнень покшолгавтомасо. Кортамось, васняяк, моли ломантнень пряст ветямодост, Закононтень мелест явомадост.
Госавтоинспекциянтень ськамонзо киланготнесэ сэтьмечинть кисэ «тюремась» а идеви, тевесь пек покш.
Пек талновтыцят тевтне республикань ведтнень маласояк. Кизэнь перть ваясть 75 ломанть. Ламотне ульнесть иредьстэ.
Пшкадян весенень, кинень питней малавиксэст, содавиксэст ды ялгаст эрямост ды шумбрачист, эряви лоткавтомс стяконь куломатнень. Мелявкстомочись, мельтемечись ве минутасто сези тетянь, авань, церань ды тейтерень эрямот.
Эряви кирдемс мельсэ, сехте питнеесь, мезе ули мода-масторонть лангсо – ломанень эрямось. Килангонь ардомань правилатнень содамось ды топавтомась, ведь лангсо видестэ прянь ветямось лездыть ванстомс сонзэ.
Минек сэтьмечись – эсенек кедьсэ!
Кода яволявтсь «Единая Россия» партиянь генеральной советэнь Президиумонь секретаресь, РФ-нь Государственной Думань Председателень полавтыцясь Вячеслав Володин, «Качество жизни» проектэнть прявт тевезэ – медицинань учреждениянь (больницятнень, поликлиникатнень) зданиятнень витнемась-петнемась. Течи 30 тыщат зданиятнень эйстэ 7 тыщатне пек берянть, 8 тыщатнесэ арась пси ведь, 2 тыщатнесэ – водопровод, малав 3 тыщатнесэ арась канализация.
Те тевентень федеральной бюджетстэ явовить 460 миллиардт целковойть, конатне пачтявить регионтнэс 2011-12 иетнестэ. 300 млрд. целковойтне максовить больницятнень витнемантень-петнемантень ды вадрялгавтомантень.
Истя жо ванкшновить больницятненень ды поликлиникатненень од оборудованиянь рамамодо, лецицятнень квалификацияст кепедемадо, медицинань важодицятнень зарплатаст покшолгавтомадо кевкстематне. Течи масторсонок лецицятне а сатыть. Секскак медицинань теевикс услугатне а пек вадрят. «Качество жизни» проектэнть прявт тевезэ – «кепедемс» врачтнень лемест, покшолгавтомс зарплатаст.
2010 иестэнть од тевс тонавтнесть Мордовиянь 1800 важодицят. МР-нь важодемань рынкасо стакачитнень киртямонть коряс Программанть лувсо тенень явозь 30 миллионт целковойде ламо, теке марто, 21 миллионтнэ – федеральной ды 9 миллионтнэ – региональной бюджеттнэстэ.
Кода тешкстызь МР-нь Трудонь ды занятостень коряс государственной комитетсэ, неень шкане Программанть коряс важодить 29 организацият ды предприятият. 816 робочейть уш прядызь тонавтнеманть ды ней важодить. Седе эрявикс специальносттне, конатнень коряс ютавтови одс тонавтомась – стропальщик, электровозонь машинист, ручной сваркань электросварщик, пекарь, конфетчик, кондитер.
Меельце шкастонть республикань ламот министерстватнесэ ды ведомстватнесэ теевить итогт иенть ушодовомсто шканть перть. Аволь пек умок седе, мезе теевсь тедедень кото ковтнень перть толковасть МР-нь Прокуратурасо.
Неень шкастонть экономикасо уликс стакачитнень пингстэ Мордовиянь прокурортнэ ветить профилактикань робота, вельдензэ а нолдавить социальной мельсапаротне, кирдеви правопорядкась. Иенть ушодовомсто саезь пшти вановт ало важодемань кис зарплатань шкастонзо пандомась, приоритетной национальной проекттнэнь тевс нолдамось, модань ды административной законодательстванть топавтомась.
Кода икелеяк, топавтовить тевтне инвалидтнэнь, ветерантнэнь ды аволь совершеннолетнейтнень праваст а коламонть мельга ваномсто. А кадовить мельтеме сетнеяк, конат эрить специализированной социальной ды медицинань учреждениятнесэ (чинь ды вень перть тосо кирдевицятне). Покш мель явови килангонь зыянов тевтнень а нолдамонтень.
Неень шкане ламотнень юткстонок талновты шкастонзо зарплатань пандомась. Паро, што те кевкстеманть коряс Мордовиясо стакачить арасть. Прокуратурань важодицятнень тевест – ваномс, кода тевень максыцятне топавтыть лангозост путозь ответственностенть.
Прокурортнэнь ванкшномаст ды кармавтомаст коряс пандозь зарплатань коряс долкось 21070 тыщат целковойть. Те иень июнень васенце чинтень зарплатань коряс долкось кадовсь вете организациясо 7586 тыщат целковойть, те суммась 2176 тыщат целковойде седе аламо те иень январень 1-це чинтень. Теде башка, райононь прокурортнэ мусть эште 43 предприятият, косо весемезэ пуромсть 20856 тыщат целковойть апак пандо ярмакт, тевень максыцятне зарплатань а пандомадо статистикань органтнэс эзть пачтя.
Прокуратурань важодицятне ютавтыть ванкшномат экономикасо преступлениятнень а нолдамга, конат сюлмазь федеральной ды республиканской бюджеттнэстэ явозь ярмактнень экономикань объекттнэсэ ды агропромышленной комплекстнэсэ тевтнень ладямс, экономикань ды социальной енксонь целевой программатнень тевс нолдамс.
Пель иень перть ушодозь 41 уголовной тев, конат сюлмавозь национальной проекттнэнь тевс нолдамост марто.
Содазь, прокуратурань важодицятне тевест ветить вейсэ ваныця органонь службатнень марто. Вейке-вейкень чарькодеманть, лездамонть, лангс ливтезь коламотнеде пачтямонть, правань акттнэнь проекттнэнь тонавтнемаст вельде малав колмоксть киртявсть модань законодательствань коряс коламотне. Пек седе киртявсть эсь олясо моданть саемань тевтне. Иенть ушодовомсто мель явовсь пертьпельксэнь ванстомань коряс законодательстванть колыцятнень лангс ливтемантень.
Прокуратурань органтнэ лангс ливтсть коррупциянть марто сюлмазь контрольно-ревизионной ды надзорной органтнэнь тевстэст ламо коламот. Тевень топавтомань (должностень) коряс полавтовсть ломантне, конат судязь коррупциянь преступлениятнень теемаст кисэ.
Зыянов тевтнень а нолдамга правань ванстыця органтнэнь марто вейсэ седе виевстэ тевтнень ветямось лездась киртямс преступлениятнень 11,1 %. Сынст панжомаст кассь 3,5 %. Свал шкань роботась, конась, васняяк, ветяви преступлениянь а нолдамонь (профилактикань) лувсо, лездась аламолгавтомс сеть зыянов тевтнень, конат лиснить общественной таркатнесэ, кудоютконь тевтнень ветямсто, иредезь, зярдо сынст теить кемгавксово иеде одтнэ эли сынст марто вейсэ.
Меельце шкастонть неявиксстэ киртявсть наркотиктнень марто сюлмавозь зыянов тевтне.
Правань ванстыця органонь сотрудниктне тейсть покш робота таргамонь човорявкстнэнь закононь колазь лиятненень максомаст-миемаст тевтнень лангс ливтемаст коряс. Васняяк, сетнень, конат кандыть зыян граждантнэнь шумбрачизэст. Таргамс а меревиця човорявкстнэнь закононь колазь тевс нолдамонь коряс ушодозь 21 уголовной тев, 7 уголовной тевть кучозь судс.
Прокуратурань, следственной ды оперативной подразделениятнень вейсэ важодемаст вельде пель иень перть панжозь ды ванкшнозь 158 преступленият, конат теезь икелень иетнестэ. Поладови роботась организованной преступной вейсэндявкстнэнь лангс ливтемаст коряс.
Ютазь недлясто РФ-нь Президентэсь Д.А.Медведев евтась мель-арсема милициянть лемдемс полициякс. «О полиции» законопроектэсь ашти 11 главасто ды 57 статьясто. Эйсэнзэ тешкстазь: «полициянть тевезэ – Россиянь Федерациянь ломантнень эрямост, шумбрачист, праваст ды олячист ванстомась,…зыянов тевтнень, кажотнень а нолдамось».
Д.А.Медведев толковизе, Октябрянь революциястонть саезь, правань ванстыця органтнэ кармасть лемдевеме милициякс, мезе тешкстась сынст важодицянь, сокицянь-видицянь лувост, лиякс меремс, «погон марто дружинникть», эсь мелест коряс сэтьмечинь ванстыцят.
РФ-нь Президентэсь Д.А. Медведев законопроектэнть ванкшномантень алтазь промкссонть тешкстызе, келя, масторонтень эрявить алкуксонь профессионалт, конат важодить лезэвстэ, видестэ, тевень содазь. Ды сась шка велявтомс правань ванстыця органтнэнень икельксэнь лемензэ – полиция.
Тешкстасынек, «О полиции» законопроектэсь ашти МВД-нь реформанть пельксэкс. Васняяк, милициянь важодицятне «олякстомтовить» сеть тевтнеде, конат а совить икелест путозетнень юткс. Те лезды, нама, явомс седе ламо мель эрицятнень праваст, сынст сэтьмечист ванстомантень, зыянов тевтнень а нолдамонтень ды апак учонь тевтнень киртямонтень. Законопроектэнть коряс внутренней тевень органонь важодицятнень арсеви киртямс 20 процентс. Те лезды покшолгавтомс милиционертнэнь зарплатаст, виевгавтомс правань ванстомань органтнэс важодицятнень саемадо системанть. Совавтовиця полавкстнэ лездыть ванстомс эрявикс, вадря сотрудниктнень, кармавтсынзе сынст педе-пев топавтомс максозь тенст тевтнень. «РИА Новости» агентстванть пачтямонзо коряс, тедедень октябрянь 1-це чинтень весе милиционертнэ одс ютыть аттестация.
Д.А.Медведевень кармавтоманзо коряс, «О полиции» законопроектэсь путозь Интернетс. Весе эрицятненень сонзэ мереви ванномс zakonoproekt2010.ru сайтстэнть, ловномс, ванномс башка енксонзо, истя жо кадомс эсест мелест-арсемаст, тешкстамс законопроектэнть асатыксчинзэ. Интернетсэ сон карми улеме сентябрянть куншка читнес. Теде мейле документэнтень совавтовить весе эрявикс полавтоматне. Целанек жо анокстамс сонзэ арсеви тедедень декабряс.
РФ-нь Президентэсь Д.А. Медведев макссь кармавтома, покш мель марто ванномс весе арсематнень, полавтоматнень, конатнень кармить евтамо эрицятне. Тешкстасынек, законопроектэнть Интернетс путомадонзо мейле, васенце минутатнестэ ломантне уш евтасть сядодо ламо арсемат. Ваномга, ловныцятне евтыть мельть, законопроектэнтень совавтомс истямо пелькс, косо тешкстазь, полицейскойтне невтест удостоверенияст васенце вешеманть коряс.
«РИА Новости» агентствась пачти, келя, РФ-нь Внутренней тевень министрась Рашид Нургалиев истя жо евтынзе мелензэ-арсеманзо «О полиции» законопроектэнть коряс. Сонзэ валонзо коряс, полициянть прявт тевекс карми зыянов тевтнень а нолдамось, сынст профилактикась. Теде башка, евтась мель, полициянть финансированиязо ютазо федеральной бюджетстэ.
Августонь 20-це чистэ лыжно-биатлонной комплекссэ ПФО-со Россиянь Президентэнть Полномочной представиsтелесь Г.А.Рапота ды Мордовиянь Прявтось Н.И. Меркушкин панжизь кизэнь биатлононь коряс мирэнь чемпионатов Весеросссиянь отборочной соревнованиятнень.
Пелькстамотнесэ улить кочказь кавтонь-кавтонь изницят эрьва возрастной группасонть, конат седе тов молить мирэнь чемпионатов Россиянть пельде.
Григорий Рапота тешкстызе, келя, неть пелькстамотне а стяко ютавтовить Мордовиясо, эдь тесэ спортонтень явови пек покш мель. Сон арсесь масторонь сехте паро биатлонисттнэнень вадря стартт раськеютконь ды весеросссиянь пелькстамотнесэ.
Соревнованиятнесэ пелькстыть 70 ламо участникть масторонь 9 регионтнэстэ. Истят соревнованиятне ютавтовить уш нилецеде. Мирэнь чемпионатось карми ютамо Польшасо Душниках Здруй ошсонть сентябрянь 19-26 читнестэ.
Россиянь спортонь, од ломанень политикань ды туризмань министрась Виталий Мутко евтынзе регионтнэнь, конат лововить национальной спортонь лидерэкс. Флагмантнэнень сон кандынзе Мордовиянть, Башкортостанонть ды Татарстанонть.
«Бути кортамс спортонь ды физкультурань касомань-кепетемань комплексной невтематнеде, сестэ лидерэкс мон евтасынь Мордовиянть, Башкортостанонть ды Татарстанонть. Бути жо поладомс седе тов, ве рядс мартост аравтовлия Чувашиянть, Московонть, Московонь, Свердловонь, Новосибирскоень областтнень, Красноярской краенть ды Санкт-Петербургонть. Те минек нежетькс региононок, конатнень лангс покш кемеманок. Нама, вадряль бу, штобу сыненст малавгадовольть лиятнеяк, теке марто, Кавказонь республикатне», – мерсь Виталий Мутко.
Спортонь министрась истя жо тешкстызе, што бути кавто иеде икеле целевой федеральной программатнесэ примасть участия Россиянь 41 регион, ней сынст ламочист кассь 73.
Августонь 16-22 читнестэ Саранскойсэ ютавтови Равчирень васенце дивизиононь ды Премьер-лигань футболонь клубонь од ломанень командатнень ютксо Россиянь первенствань зональной турнирэсь. Саранскоев сыть налксеме кото командат. Ютксост «Динамось» (Москов), «Волгась» (Нижней Новгород), «Балтикась» (Калининград), «Шинникесь» (Ярославль) ды истя седе тов.
Турнирэнь весе налксематне ютавтовить «Старт» стадионсо.
В начало