Августонь 20-це чистэ Мордовия Республикасо кармась важодеме Россиянь Президентэнть приемноезэ. Панжомонзо сакшнось Рав чирень федеральной округсо Россиянь Президентэнь Полномочной представителесь Григорий Алексеевич Рапота. Приемноенть ванномсто Мордовиянь Прявтось Н.И.Меркушкин тешкстызе, эрьва нупальсэнть – неень шкань телекоммуникациянь оборудования, мезесь лезды ютавтомс аудио- ды видеоконференцият, кортамс Россиянь Федерациянь Президентэнть марто. Приемнойсэнть теезь эрявикс условият сыре ломантненень, лавшо шумбрачи марто эрицятненень, важоди авань ды эйкакшонь нупаль. Малав эрьва кабинетсэнть ветяви видеонаблюдения, тень веши тешкстазь регламентэсь. Мордовиясо Президентэнь приемноесь панжовсь шкадо икеле, ды республиканок совась васенце регионтнэнь юткс, косо улить истят приемнойть.
      Рав чирень округсо РФ-нь Президентэнть Полномочной представителезэ Григорий Рапота мерсь, келя, Президентэнь приемнойтне аштить сюлмиця пельксэкс эрицятнень ды властенть ютксо, лездыть пшкадемс талновтыця кевкстематнень лангс. Кода тешкстызе Григорий Рапота, седе сеедьстэ эрицятнень пеняцямост сюлмазь жилищно-коммунальной сферанть марто.
      – Ламот эрицятне кевкстемаст марто бажить пшкадемс видьстэ Президентэнтень эли Правительствань Председателентень, зярдо неть стакачитнень мереви ванномс эсест регионсо. Арсян, ней, зярдо панжовсь Россиянь Президентэнть приемноезэ, республикань эрицятне яволявтомаст пачтямо кармить тей, – мерсь Григорий Рапота.
      Президентэнь приемнойсэнть эрицятнень марто васенце вастовоманть ютавтызе Григорий Рапота. Сон ванкшнынзе пшкадематнень, конатнесэ энялдсть Мордовиясо чачозентень, армиянь генералонтень М.А.Пуркаевнень памятникень путомадо, Саранск ошонь округсо ламо этажонь эрямо кудонь витнемадо, Ромоданова енксонь Трофимовщина велень эрицятненень симема ведень пачтямодо. Весе яволявтоматнень коряс максозь эрявикс кармавтомат, топавтомаст мельга карми ванномо Рав чирень округсо РФ-нь Президентэнть Полномочной представителенть аппаратозо.
      * * *
      Теде мейле Рав чирень федеральной округсо РФ-нь Президентэнть Полномочной представителесь Григорий Алексеевич Рапота якась С.Д.Эрьзя лемсэ музеентень. Ваннынзе Федот Васильевич Сычковонь ды лия художниктнень картинаст.
      Ютавтозель экскурсия музеень весе залтнэва. Г.А.Рапотань мельс тусть ине скульпторонть Степан Эрьзянь важодеманзо ды эрзя-мокшонь раськень оршамопельтне.